30 anyos gipusil patay sa 17 anyos sa Boljoon

Usa ka 30 anyos nga lalaki ang gibuko-buko pagpusil patay sa usa ka menor de edad kuyog ang uyoan sa gikatahapan samtang sila nagkaabot sa miaging adlaw pasado alas 4 sa hapon didto sa Sitio Lingatong, Upper Becerril Boljoon.

Gituohan sa kapolisan ang motibo sa krimen mao ang karaang panagbangi sa biktima ug sa gikatahapan.

Ang biktima giila sa kapolisan nga si Ricardo Rivas, minyo ug residente sa nahisgutang lugar.

Ang gitumbok nga nipusil sa biktima, 17 anyos, ulitawo ug ang uyoan niining 31 anyos.

Ang biktima nakaangkon og usa ka samad sa buko-buko agi sa bala sa 9 mm nga gigamit sa gikatahapon nga maoy nakaingon sa hinanaling kamatayon niini.

Human sa pagpamusil ang suspek ug ang uyoan nadakpan sa hot pursuit sa kapolisan didto sa Poblacion dihang padung na kining mosibat.

Si SPO4 Cristino Oraca nga nahinabi sa Banat News niingon nga sa iyang pagsukit-sukit sa duha ka suspek niingon nga sila maoy unang giatake sa biktima dala ang sundang samtang paingon na sila mamauli gikan nagkawos og tubig.