Sakop sa Akrho gipatay atubangan sa uyab atol sa iyang birthday

Patay ang usa ka tinun-an sa kursong nautical nga giingong sakop sa Alpha Kappa Rho fraternity human kini pusila sa usa ka wala mailhing tawo diha duol sa usa ka restobar sa eskina sa Escario Extension ug dalan Acacia sa Camputhaw niadtong milabay'ng gabii.

Ang namatay giilang si Jude Dominic Villano,19, residente sa PBL Housing sa barangay Busay ning dakbayan human kini makaangkon og usa ka samad pinusilan sa likod.

Usa ka wala mailhing lalaki nga gibana-banang 5'7 ngadto sa 5'8 ang height, kasarangan ang panglawas, semi-opaw ang buhok ug nagsuot og body fit nga kolor itom nga t-shirt ug maong nga pantalon maoy gitumbok nga mipusil sa biktima.

Sa imbestigasyon sa grupo ni PO3 Rogelio Nedamo sa Homicide Section gikatahong nagkuyog ang biktima ug iyang uyab nga si Loarni Gomez,19, diha sa maong lugar padulong unta sa Indian Ocean Restobar dihang gisundan sa maong lalaki ug walay daghang pahimangno nga mipusil kaniya makausa ka higayon.

Sumala pang PO3 Henry Estoy sa pakighinabi sa Banat News nga ang biktima nagselebrar sa iyang birthday niadtong adlawa ug gikan sila sa panimalay sa biktima aron moadto sa maong restobar diin magpaabot ang ilang mga brod sa Akrho.

Matud pang Estoy ang usa sa mga brod ni Villano nga si Mark Dumalig nga giingong diha na sa maong restobar maoy midala sa biktima sa Perpetual Soccuor Hospital alang sa pagpatambal apan nakabsan kini sa kinabuhi pipila ka minutos ang milabay.

Si Dumalig matud pa ni Estoy mitug-an nga wala nila damhang moapas si Villano diha sa maong restobar sanglit ilang nasayran nga nagkuyog kini sa iyang uyab.

Sa pagkakaron dili pa matumbok sa Homicide Section kung ang mamumuno miyembro ba sa ribal nga fraternity sanglit walay nakaila niini.