Gungob pabor nga Cebu buakon-makaduha

Dakong pabor si Mayor Avelino Gungob Sr. sa Consolacion nga buakon ang Sugbu ngadto sa duha ka lalawigan nga tawgon og Cebu del Sur ug Cebu del Norte.

Gipadayag ni Gungob kining maong hunahuna human siya palagpota gikan sa One Cebu Party ni Gobernador Gwen Garcia niadtong Huwebes sa gabii.

Si Gungob kinsa mibalik sa iyang orihinal nga Lakas-Christian Muslim Demoracts (Lakas-CMD) nga partido nagkanayon nga sama sa Cebu City nga gibahin og duha ka distrito, mogaan ang pagdumala sa lalawigan sa Cebu kun adunay duha ka gobernador nga magdumala niini.

Si Gungob gilabhan og kasaba sa gobernador gumikan sa pagsuporta niya kang Provincial Board member Luigi Quisumbing nagkanayon nga dili usab siya pabor sa Sugbuak proposal nga nagduso og upat ka lalawigan sa Sugbu.

"Ang duha ka probinsiya maoy haom kaayo alang sa Cebu" matud pa ni Gungob kinsa mipasabot nga mayoridad sa mga mayores pabor kaayo sa prinsipyo nga buakon ang Sugbu sa duha ka bahin.

Nasayran gikan kang Gungob nga kun mabuak ang Cebu sa duha ka probinsiya, mosamot kadako ang Internal Revenue Allotment niini busa makaayo sa tanang mga Sugbuanon.

Alang kang Gungob mas gaan dad-on ang lalawigan sa Cebu kun duha ka gobernador ang magdumala niini kay diyutay nalang ang lungsod nga atimanon sa matag gobernador.

Sa pagkakaron miingon si Gungob nga bug-at kaayo sa usa lang ka gobernador ang pagdumala sa 48 ka lungsod ug lima ka dakbayan ug maoy hinungdan nga naa gyu'y mga lungsod nga magmahay kay dili na maatiman pag-ayo sa gobernador.