COMELEC mohatag og pasidungog

Nag-andam karon ang Commission on Elections og ganti alang sa ilang mga opisyal ug mga kawani nga makapakita og maayong buhat atol sa eleksiyon karong Mayo 14, 2007.

Ang makadawat sa ganti ug pasidungog mao ang mga sakop sa board of elections inspectors, board of canvassers, deputized personnel gawas sa mga nagranggo og director III sa Comelec, deputy regional director sa kapolisan ug regional commanders sa armadong kusog sa nasud.

Ang Comelec mopili og tulo ka best board of election inspectors ug makadawat sa "Parangal sa Tinig ng Bayan" plaque ug kwarta nga P45,000; P30,000; ug P15,000.

Tulo usab ang pilion sa mga board of canvassers sa lungsod, syudad, lalawigan ug distrito nga makadawat og "Parangal sa Malayang Halalan" plaque ug kwarta nga P60,000; P45,000; ug P30,000 samtang ang individual awards makadawat og tag P25,000.

Ang individual awards apilan sa most outstanding provincial election supervisor, election officer, field employees, employee in the main office ug most outstanding employee of the deputized agencies.

Ang criteria nga gilatid sa Comelec naglangkub sa kahanas sa ilang trabaho, walay partidohay, kaisog sa trabaho, kalisud sa lugar, dili modawat og suburno, kapaspas sa pagduso sa report ug uban pa.

Ang komitiba umulon sugod sa lungsod ug syudad, distrito, probinsiya, rehiyon ug nasyonal.

Ang mga rekomendasyon dawaton hangtud sa Hunyo 30, 2007 apan wala pa matakda sa Comelec ang awarding ceremonies.