'Asset' gipatay

Usa ka gikatahong asset sa Criminal Investigation and Intelligence Branch sa Cebu City Police Office ang gipusil patay sa iyang kainom diha sa sitio Paglaum sa barangay Calamba niadtong milabay'ng gabii.

Ang gipatay giilang si Richardson Bangas, 29, minyo ug residente sa dalan V.Rama sa naasoy'ng barangay kinsa giingong miyembro sa Barangay Intelligence Network.

Usa ka lalaking giila lang sa ngalan nga Eboy nga taga dalan V.Rama sa maong barangay ang gitumbok nga mipatay sa biktima human mitumaw ang ilang mainitong panaglalis.

Sa imbestigasyon ni PO3 Rogelio Nedamo sa homicide section mitumaw base sa pamahayag sa usa ka testigo nga nag-inom si Bangas ug ang suspek uban sa lain pa nilang mga higala niadtong tungora kalit nga naglalis ang duha.

Gikatahong gisukmag sa biktima ang suspek apan mibawos ang naulahi pagbunot sa wala matinong kalibre sa armas dayong pusil sa likod sa biktima makausa.

Ang suspek daling miikyas sa dapit samtang daling gidala sa Vicente Sotto Memorial Medical Center si Bangas apan matud pang Nedamo pagka-alas singko sa kaadlawon kagahapon nakabsan kini sa kinabuhi.

Wala pa matino sa kapolisan kung unsay motibo sa pagpatay ug kung may kalambigitan ba kini sa pagka-asset sa biktima sa kapolisan.