Nabantayan nga daghang mga polis nga dili na magsul-ob og crash helmet, ilabi na kun sila magsul-ob og uniporme, samtang ang uban nga polis bisan og magsibilyan dili mag-crash helmet.
Ang kadagkoan sa committee on police sa konseho sa dakbayan nga gipangulohan ni Konsehal Procopio "Coping" Fernandez naghunahuna karon kun unsay tukmang himuon batok sa maong mga polis.
Dunay pipila ka konsehal nga mihandom nga kaniadto ang mga polis dinhi sa dakbayan mahadlok nga mosakay og motorsiklo nga dili makasul-ob og crash helmet.
Kini tungod kay si kanhi vice mayor Renato Osmeña nga maoy chairman kaniadto sa Police Coordinating and Advisory Counsil, ug si Konsehal Rogelio "Jingjing" Osmeña nga maoy chairman sa committee on police, estrikto kaayo sa pagpatuman sa ordinansa.
Kaniadto ang mga sakop sa CITOM gimandoan nga dili mahadlok sa mga polis nga masakpan nga dili magsul-ob og crash helmets, samtang ang mga polis nga masakpan tangtangan sa ilang tagsa ka libo ka pesos nga binuwan nga incentive.
Usa ka CITOM enforcer miangkon nga bakikawan sila nga modakop sa mga polis tungod sa pagtuo nga sigurado kining masuko kun ilang dakpon.
Dunay sugyot nga taktakon sa serbisyo kadtong mga CITOM enforcers nga dili modakop sa mga polis nga dili magsul-ob og crash helmet sa pagsakay og motor, samtang kadtong mga polis nga mibaliwala sa ordinansa dili na hatagan og City Hall cash incentive.