40 ka balay naugdaw

Giugdaw sa dakong sunog sa sitio Panagsama sa Basak-San Nicolas ang 40 ka mga balay kagahapon sa kaadlawon, kini maoy ikapitong natalang dakong sunog nga miigo dinhi sa dakbayan sugod niadtong unang adlaw ning bulana.

Ang alarma nadawat sa kabomberuhan alas 2:55 sa kaadlawon diin ang sunog gikatahong nagsugod diha sa ground floor sa duha ka andanang balay nga gipanag-iya ni Edmund Apiag nga ginama sa mga kahoy.

Wala pa hinuon matino sa imbestigador sa Cebu City Bureau of Fire Protection nga si SFO2 Felix Romero kung unsay sinugdanan sa maong kalayo.

Ang kabalayan gikatahong kasagarang ginama sa mga light materials ug daling midukot hinungdan nga paspas ang pagkatap sa kalayo sa mga sikbit nga balay.

Apiag kinsa misuway og pawong sa kalayo gikatahong napaso sa likod, samtang mikabat sa P800 mil ang danyos sa maong sunog.

Ang sunog giisa ngadto sa third alarm tungod sa peligrong makakatap kini sa sikbit nga mga sitio apan nakontrolar kini dayon sulod lang sa 20 minutos nga kumbate.

Ang mga mirespondeng fire fighters gilangkuban sa tanang fire sub-stations sa dakbayan lakip na ang mga volunteer fire brigades sa Emergency Rescue Unit Foundation, Filipino-Chinese Fire Brigades ug uban pa.

Si Fe Esrael sakop sa Gender and Development sa maong barangay sa pakighinabi sa Banat News nagkanayon nga dunay 75 ka pamilya ang naapektahan sa maong sunog. Ang mga biktima sa sunog kasamtangan karong nagpundo sa Panagsama basketball court dili layo sa nasunog nga lugar.