Puya gibaligya sa mananabang

Mananabang gipasanginlang mibaligya sa tulo ka adlaw nga puyang lalaki gisikop diha sa Sitio Merkado, Basak dakbayan sa LapuLapu sa milabay’ng adlaw.

Ang gisikop mao si Rogelio Coca Ardin alyas Dino, 67, minyo ug nagpuyo sa Sitio Sudtungan sa maong barangay usa ka mananabang o manghihilot sa maong dapit.

Base sa imbestigasyon ni P/Insp. Roldan Daniel, hepe sa presinto 3 ug PO1 Lorgina Perez sa Women’s Desk nasayran nga si Ardin maoy mananabang nga nagpaanak ni Violeta Opia diin iyang gihimugso sa ilang panimalay ang maong tulo pa lang ka adlaw nga bata.

Gumikan kay wala gihapon mogawas ang inunlan sa bata ug naglisod si Ardin ila kining gidala sa LapuLapu District hospital ug gibilin kang Ardin ang bata.

Apan ang suspek gikatahong mihagad sa mga tawo sa Merkado, Basak aron ibaligya ang bata sa presyo nga unom ka libo ka pesos.

Si Flora Arcenal nga usa sa gihagad ug tag-iya sa usa ka tindahan sa maong dapit mitawag sa kapolisan hinungdan sa pagkasakop sa akto nga mibaligya sa maong bata.

Si Ardin hugot nga mihimakak sa alegasyon nga siya mibaligya sa bata apan nakuha sa posisyon niini ang usa ka blangko nga Certificate of Live Birth ug mga stamps. Matod pa ni PO1 Perez nga nahinabi sa Banat News si Opia (inahan sa bata) miangkon nga dili siya makabuhi sa maong bata hinungdan nga buot kini niyang ipa-adopt sa laing tawo, apan wala kini mosugo ni Ardin nga ibaligya ang iyang anak sa bisan kinsang tawo.

Si Opia nga moluwat ug affidavit kalabot sa maong insidente ug si Ardin kasamtangang mabalhog sa bilanggoan.

Matud pa ni PO1 Perez pormal na nilang gipasaka ang kasong kalapasan sa Akta Republika 9208 in relation to RA 7610 nga mga kasong Anti Trafficking in Person ug Child Abuse.

Ang maong puya naa karon sa kustodiya sa DSWD samtang ang inahan nga si Opia bag-ohay lang nakagawas sa tambalanan.