Sikyu giilogan og armas

Usa ka gwardiya nga magbalantay sa Prince Warehouse Club diha sa dalan M.C.Briones ang giilogan og armas ug gipusil sa duha ka wala mailhing tawo kagahapon sa kaadlawon.

Ang napusilan giilang si Vicente Fariolen, 28, residente sa Tugasan, Guadalupe ug sakop sa Mandi Security Agency kinsa magbalantay sa maong establisamento.

Duha ka wala mailhing lalaki nga nagsakay og kolor pulang Yamaha nga motorsiklo maoy gitumbok nga miilog sa armas sa biktima ug mipusil kaniya.

Sa imbestigasyon sa Homicide Section mitumaw nga kasamtangang naglingkod si Fariolen sa bangko diha sa iyang pwesto dihang miabot ang mga suspek dayon miduol diha sa iyang likod.

Usa sa mga suspek nga gikatahong miibot sa armas ni Fariolen gikan sa luyo hinungdan nga nakiglayog kini sa miilog sa iyang armas apan nalupigan kini ug nahayang sa dalan ug nakuhaan sa iyang service revolver nga .38 kalibre.

Diha-diha ang duha gikatahong mitabang og pusil kaniya duha ka higayon ug naigo sa iyang likod, dayon daling nangikyas sakay sa ilang motorsiklo.

Si Fariolen gidala sa Cebu City Medical Center tungod sa iyang samad pinusilan, wala pa matino sa kapolisan kung ang kaugalingon niining armas maoy gigamit sa pagpusil kaniya.