Bata nabuthan sa Blasting Cap

Usa ka 11-anyos nga tinun-an sa grade 4 nalandig sa tambalanan human napaso ang kalawasan sa dihang nabuthan sa blasting caps nga gisumpay sa 1.5 boltaheng bateriya, samtang sa laing insidente, usa ka mananagat ang namatay human mabungkag ang dughan tungod sa pagkabungkag sa dinamita diha sa iyang atubangan.

Nahitabo ang unang insidente sa Dumalan Elementary School, sa bukirang barangay sa Dumalan, Dalaguete, Cebu sa miaging hapon, diin ang batang si Maximo Bejec Dicdican nga residente sa maong lugar nadala gyud sa Cardinal Rosales Memorial Medical District Hospital ug gibalhin dayon sa Vicente Sotto Memorial Medical Center human mahiagum og daghang paso ug gagmay'ng samad sa nawong ug kalawasan.

Sa imbestigasyon nilang PO3 Cleto Pia ug PO1 Noeh Rosales nasayran nga ang blasting cap gikuha ni Maximo sa bag sa iyang manghod nga nagtungha sa grade 1 sa susamang tunghaan.

Sumala pa sa kapolisan nga ang blasting cap hinatag sa classmate sa manghod ni Maximo.

Matud pa nga taliwala sa klase, gisumpay ni Maximo ang tumoy sa blasting caps ngadto sa 1.5 boltaheng Panasonic nga bateriya hinungdan sa pagbuto niini atubangan niya.

Na-recover sa kapolisan ang mga tipaka sa blasting cap ug bateriya.

Gisusi karon sa kapolisan kun diin gikan ang blasting cap.

Ang Dumalan dili layo sa minahan sa Dalaguete nga gidumala karon sa mga Taiwanese.

Sa laing bahin, nabungkag ang dughan sa usa ka mananagat human kini mabuthi sa dinamita nga gigamit niini sa pagpangisda sa Sitio Lupa, Punta Engaño, LapuLapu sa milabay'ng udto.

Namatay gyud ang ulitawong mananagat nga si Jolito Ponce Dihayco, 36.

Sa imbestigasyon ni PO3 Manolito Abellanosa sa Homicide Section sa LapuLapu nasayran nga sa wala pa mahitabo ang maong insidente, si Dihayco nag-inusara nga nagpahigayon og pangisda sa maong dapit gamit ang dinamita.

Si Enrico Dihayco, igsuon sa biktima nga nanagat usab sa maong dapit, nakadungog og sipang buto ug sa iyang pagsusi sa sakayan sa dagat iyang igsuon ang nagbuy-od nga wala nay kinabuhi.

Si Jolito nakaangkon og mga samad sa iyang kamot, kalawasan ug nabungkag usab ang dughan niini agi sa kakusog sa pagbusikad sa dinamita.

Wala na madala pa sa tambalanan si Jolito sa iyang mga kabanay gumikan sa kahadlok nga kini madiskobrehan nga nanagat sa ilegal nga paagi. Gideretso kini sa punerarya.

Nasayran usab nga adunay nervous breakdown ang biktima hinungdan sa ilang pagduda nga wala dayon mabuhii sa biktima ang dinamita atol sa pagpanagat.

Matud pa ni Enrico nga ang nahitabo sa iyang igsuon nagsilbing leksiyon ngadto kanila nga dili molambigit sa ilegal nga pagpanagat ilabi na sa paggamit og dinamita.