Walo ka balay ugdaw sa sunog, 17 ka tawo paso

Mga 17 ka tawo ang nakaangkon og paso sa lawas, walo ka mga panimalay ang naugdaw ug duha niini ang partially burned diin pulos gama sa gaay nga materyal sa nahitabong sunog mga alas 11:25 kagahapon sa buntag diha sa dalan Alumnus, Tabada Mambaling ning dakbayan.

Si Cebu city fire investigator SFO2 Frank Donozo mibutyag sa Banat News nga ang maong sunog mi-abot gyud sa 3rd alarm hinoon nakontrolar kini sa kabomberohan sulod sa 13 minutos gikan sa ilang pagresponde.

Matud ni Donozo nga ang sunog naggikan sa panimalay ni Freda De la Peña human wala matarong og taud ang barbola sa hose sa Liquified Petroleum Gas (LPG) dihang magluto unta kini sa ilang pani-udto hinungdan nga mihungaw kini og miulbo ang kalayo nga gidakop usab sa laing burner nga nagsiga na niadtong higayona.

Mikabat sa P250 mil ang danyos sa maong sunog ug 17 ka tinun-an kinsa nag-abang duol sa dapit nga nasunogan ang nangapaso ang tuong bukton dihang mitabok gyud kini sa dalan bisan og nag-ulbo ang kalayo sa sunog.

Samtang sa laing bahin upat ka panimay ang hingpit nga naugdaw sa nahitabong sunog kagahapon sa kadlawon didto sa Poblacion Barili.

Ang alarma nadawat sa kabomberohan ala 1:45 ug nakuntrolar kini sulod kinse minutos diin nidanyos og P190,000

Si PO3 Urillo sa Barili police station niingon nga nagsugod ang sunog sa pamilyang Concepcion.