Isnatser nakahikap live wire kay gigukod namatay hinuon

Gidayon na gyud pagpasaka ni Daanbantayan Mayor Maria Luisa Loot ang walo ka kasong estafa batok sa magtiayun nga si kanhi Bise-Mayor Jose De Leon Jr. ug asawa nga si Milagros ngadto sa piskaliya.

Kini gumikan kay hangtud karon wala gihapon mobayad si De Leon sa iyang utang balor og P285,833.40 sukad pa niadtong tuig 2004.

Matud pa ni Loot nga imbis nagpaabot siya nga mobayad si De Leon sa utang, pamolitika na hinoon ang giatiman sa kanhi niyang bise-mayor.

Human sa ilang panag-uban sa tuig 1998 hangtud 2001 nga eleksiyon, si De Leon nakig-atbang kang Loot sa pagka-mayor sa eleksiyon sa tuig 2004 apan napilde.

Si De Leon nagtinguha na usab nga makig-atbang sa pagkabise-mayor batok ni Loot kinsa dili na makapasubli sa pagka-mayor karong Mayo 14 nga eleksiyon.

Si De Leon giingong nangutang sa Eigado Lending Inc. nga gipanag-iya ni Loot hangtud nga nagdumili na ang iyang lending firm sa pagpagawas og dugang kwarta alang kang De Leon, ang iyang personal na nga kwarta ang gihangyo sa magtiayun nga utangon bugti sa mga tseke nga giingong dunay daghang pondo sa bangko.

Apan mao na lang ang nasuta ni Loot nga ang account ni De Leon sa Philippine National Bank sirado na.

Sukad sa Pebrero 4 hangtud Mayo 6, 2004, walo ka post dated check ang gi-isyu ni De Leon sa tag kapin sa P35,000 hinungdan nga ning-abot kini og P285,833.40 ang tanan.

Gisingil ni Loot si De Leon sa utang niadtong Hunyo 22, 2004 pinaagi sa demand letter nga gipadangat sa iyang abogado ug nadawat kini sa magtiayung De Leon niadtong Hunyo 28, 2004 apan nagdumili gihapon kini sa pagtuman sa obligasyon.

Matud pa ni Loot nga gawas sa unang walo ka kasong estafa nga iya na nga napasaka sa piskaliya, dugang pang kaso ang iyang ipasaka kon magdumili lang gihapon si De Leon sa pagbayad sa utang.