Mananagat atubangon ni Tomas

Andam og tagana nga makig-atubang si Mayor Tomas Osmeña ngadto sa pundok sa mga gagmay’ng mananagat dinhi sa dakbayan nga nagtinguha sa pagpalagpot sa katungdanan ni Bantay Dagat project director Cesar Enriquez.

Apan dili pa makapaneguro si Osmeña nga iya dayung ma-aksyonan ang gipangayo niini nga pagpalagpot sa katungdanan ni Enriquez tungod kay mohimo pa siya og subsob nga imbestigasyun aron matino ang kabalido sa maong reklamo.

Nasayran nga padayong gireklamo sa pundok sa mga mananagat dinhi sa dakbayan ang misiaw og balik nga mga ilegal nga pagpanagat sa kadagatan dinhi sa dakbayan apil na ang paggamit og dinamita nga wala gyud masulbad ni Enriquez human kini mihulip sa katungdanan sa gipatay nga kanhi project director Elpidio "Jojo" dela Victoria Jr.

Giangkon hinuon ni Osmeña nga wala dayon niya maaksyoni ang maong giduso nga reklamo sa pundok sa mga gagmay’ng mananagat dinhi sa dakbayan tungod sa iya karong ka-busy sa adlaw-adlaw’ng gimbuhaton sa City Hall.