Tomas wala wad-ig paglaum ni Jonas bisa’g ubos sa survey

Bisan gilubong og maayo si Konsehal Jonas Cortes ni Thadeo Jonkie Ouano alang sa pagka-mayor sa Mandaue sa gipahigayong survey sa mga tinun-an nga molupyo sa maong siyudad wala gihapon kawad-i og paglaum si Mayor Tomas Osmeña nga posibleng modaog sa umaabot piniliay ang iyang manok nga si Cortes.

Matud ni Osmeña nalipay kaayo siya sa maong resulta sa survey nga gipahigayon sa mga tinun-an sa University of San Carlos ngadto sa 4,000 ka mga respondents gikan sa 27 ka barangay sa Mandaue tungod kay nisukwahi kini sa iyang gituohan.

Ang resulta sa maong survey si Jonkie nakakuha og dakong bintaha nga 46 porsyento nga layo ra kaayo sa nagsunod nga si Cortes nga nakakuha lang og 38 porsyento, 7 porsyento ang kang Bise Mayor Amadeo Seno ug laing 7 porsyento ang wala pa makahukom kon si kinsa ang ilang pilion pagka-mayor.

Apan matud ni Osmeña nga maayo na lang ang maong resulta tungod kay wala gyud ma-zero si Cortes ug importante kaayo kini aron mahibaw-an kun asa dapit nahimutang ang iyang kandidatura aron mao kini angay nga tutokan atol sa pagsugod unya sa campaign period sa Marso 30.

Masaligon si Osmeña nga makabawi pa niini si Cortes tungod kay duna pay kapin sa usa ka bulan sa dili pa ang gitakdang pinili-ay sa Mayo 14.

Apan alang sa kampo ni Ouano lisod nang makaapas si Cortes ilabi na karong nagkahiusa na og balik ang pamilyang Ouano human sa pagpakig-uli ni ABC President Jovita Tuela "Joy" Ouano sa iyang igsuon nga si Mayor Thadeo Ouano ug ang paghiusa og balik nila ni Kongresista Nerissa Soon -Ruiz.

Si Jonkie maoy gituboy sa iyang amahan nga palansaron pagka-mayor human mapupos ang ikatulo ug katapusang termino niini.