Kampi nagpa-drug test

Boluntaryong nipaubos sa drug test ang tanang kandidato sa Alayon-Kampi sa lungsod sa Minglanilla kagahapon.

Ang grupo ni Mayor Eduardo Selma ug Bise-Mayor Elanito Peña ang nibisita sa PNP Crime Laboratory sa Camp Sotero Cabahug kagahapon aron pagpaubos sa drug test.

Matud pa ni Konsehal Robert John Selma nga ang resulta sa drug test gamiton sa pagsang-at sa ilang certificates of candidacy sa dili pa ang katapusang adlaw unya sa Marso 29.

Ang maong lakang isip usab pagtuman sa lagda sa Commission on Elections sa pagpangayo sa resulta sa drug test sa tanang kandidato sa bisan unsang posisyon.

Nasayran nga daghan pa gihapon sa mga napili na sa katungdanan ang wala nakapaubos sa drug test sanglit nakakita sila og lusot sa maong lagda ug giingong wala kini nahasubay sa balaud.

Apan sumala pa ni Selma nga kon ang pagpapili sa usa ka kandidato tinud-anay, kinahanglan nga mosubay kini sa tanang lagda nga dili na mangita pa og husay sa lagda sa balaud.

Giklaro usab ni Selma nga silang tanan sa grupo ang nagkauyon sa pagpa-drug test ug kamatuuran sa ilang kamatinud-anon.

Kuyog nilang Mayor Selma ug Bise Mayor Peña ang tanan nilang kandidato sa pagka-konsehal nga sila si konsehal Selma, Jimmy Caumeran, Concordio Mejias, Ramsey Sayson, Rajiv Enad, Samuel Adlawan, Lynette Geonzon ug Lamberto Reroma.