Mangaron 'bastos' nga polis – Kapitan

Hepe sa Minglanilla police station nga si Chief Insp. Joseph Mangaron gipasanginlang bastos nga opisyal sa babayeng barangay kapitan sa Tungkop sa maong lungsod nga si Olga Fiel.

Si Fiel mibutyag nga niadtong Pebrero 26 usa ka Austrian national nga si Kurt Brand ang mibastos og mga babaye pinaagi sa paghikap-hikap sa paa diha sa usa ka beach resort nga sakop sa iyang barangay diin niadtong tungora diha usab siya tungod kay giimbitar siya og tapok-tapok sa iyang paryente.

Si Fiel mipailang opisyal sa maong barangay ug mibadlong kang Brand apan wala kini mopatuo ug gihikap hinuon ang iyang paa.

Niadtong tungora naatol usab nga diha si Mangaron kinsa giimbitar usab og party sa usa ka sakop niining polis ug iyang gihangyo nga ipasikop si Brand.

Apan nakugang si Fiel sa gitubag kaniya sa opisyal dihang si Mangaron mitubag nga dakpon nila si Brand apan ilang pangwartahan.

Matud ni Fiel nga nasagmuyo siya sa gibuhat ni Mangaron hinungdan nga iyang gipaabot ang iyang reklamo ni Mayor Eduardo Selma ug sa tsirman sa komitiba sa kahapsay ug kalinaw Konsehal Jimmy Caomeran.

Si Mangaron gikatahong nangayo na og pasaylo tungod niini ngadto kang Fiel apan mas gusto ni Fiel nga mohimo og written apology ang opisyal apan hangtud ning pagsulat sa balita wala pa gihapon kini mohatag.

Mibahad si Fiel nga ipadayon niya ang iyang reklamong serious neglect of duty and conduct unbecoming of an officer.

Dugang pa ni Fiel human sila maghusay giimbitar siya ni Mangaron ug ang iyang mga higala og panihapon ug mag-inom diin kini maoy ni-order og duha ka case nga beer apan human kini makainom mibiya kini nga wala bayri ang giorder.

Si Mangaron wala mohatag og pamahayag sa mga tigbalita kabahin sa bag-ong pasangil ni Fiel batok kaniya hinuon nagkanayon kini nga na-settle na ang ilang problema ni Fiel.