USC survey sa Mandaue nag-una si Jonkie Ouano

Nag-una si mayoralty candidate Jovito Thadeo "Jonkie" Ouano sa usa ka survey sa dakbayan sa Mandaue lakip ang iyang kauban sa pagkabise-mayor nga si Konsehal Carlo Pontico Fortuna.

Kini base sa pure random survey nga gipahigayun sa mga tinun-an sa Political Science sa University of San Carlos nga ilang gitawag og "Ang Survey sa Mandaue."

Giklaro sa ilang maestro nga si Ricky Rama Poca nga walay nag-komisyon sa ilang survey ug binuhatan ug kaugalingong gasto kini sa iyang mga tinun-an.

Mokabat sa 4,000 ka mga respondents ang nalambigit sa survey gikan sa 27 ka barangay sa dakbayan sa Mandaue.

Tulo ka mga kandidato sa pagka-mayor ang gipilian nga sila Ouano, konsehal Jonas Cortes ug Bise-Mayor Amadeo Seno samtang sa pagkabise-mayor mao sila si Fortuna ug konsehal Glen Bercede.

Base sa kinatibuk-ang resulta, si Ouano nakakuha og 1,864 ka botos (46 porsyento), 1,520 kang Cortes (38 porsyento, 302 kang Seno (7 porsyento) samtang dunay 314 (7 porsyento) nga wala pa gipilian.

Samtang si Fortuna nakakuha og 1,845 ka botos (46 porsyento), 1,500 kang Bercede (37 porsyento) samtang dunay 685 (16 porsyento) nga wala pa’y napilian.

Gawas kang Seno, may mga barangay nga giangkon sila si Ouano ug Cortes ingon man sila si Fortuna ug Bercede.

Ang kasikat ug ka gwapo ni Ouano ang pipila sa rason sa pagpili sa katawhan samtang kadtong gusto sa kausaban sa dakbayan sa Mandaue ang gusto kang Cortes.

Samtang si Bercede nga nitambong sa presentasyon sa resulta sa maong survey atol sa 888 News Forum sa Marco Polo Plaza kagahapon nipadayag nga natagbaw siya sa survey.

Apan masaligon si Bercede sa iyang kadaugan batok kang Fortuna base sa ila kaugalingong pagsuhid sa kabarangayan.