Tomas motudlo ni Jonas og pamaagi

Walay pagduhaduha nga gitug-an ni Mayor Tomas Osmeña ang iyang pagsuporta ug pagtabang sa kandidatura ni Konsehal Jonas Cortes nga molansar pagka-mayor sa siyudad sa Mandaue atbang ni Thadeo Jovito "Jonkie" Ouano, anak ni Mayor Thadeo Ouano sa eleksiyon karong Mayo.

Atol sa press conference kagahapon sa udto gibutyag ni Osmeña nga ang iyang himuong pagtabang sa kandidatura ni Cortes mosentro sa pagtabang alang sa pag-organize aron makabutang kini og maayong sistema susama sa gihimo karon sa iyang partido dinhi sa dakbayan ang Bando Osmeña Pundok Kauswagan (BOPK).

Partikular nga gitug-an ni Osmeña mao ang pagtudlo sa kampo ni Cortes nga makapahigayon og pulong pulong sa dili mominos unom ka mga barangay sa Mandaue sulod lang sa 2 ka oras.

Matud ni Osmeña iya usab nga tudloan ang kampo ni Cortes kun unsaon pagpili og mga watchers, ingon man mga sakop nga maoy molangkob sa adlaw-adlaw nga kalihukan sa pagpangampanya apil na ang pag-establisar og lig-ong legal team.

Gipasabot ni Osmeña nga mas gipalabi pa niya karon ang pagtabang sa kandidatura ni Cortes kay ni Mandaue ABC president Jovita Tuela "Joy" Mangubat nga unang miduol kaniya tungod kay gipatigbabaw ni Joy Ouano niadtong higayona ang kasuko tungod sa panagbingkil sa ilang pamilya.

Matud ni Osmeña lahi ang sitwasyon ni Cortes tungod kay ang paglansar niini karon nagpakita man nga mao kini alternative candidate sa mga molupyo sa Mandaue alang sa pagka-mayor.

Niadtong Domingo, si Osmeña nitambong sa press conference nga gipatawag nila ni Cortes, Glenn Bercede ug board member Luigi Quisumbing nga mipahibalo usab sa iyang paglansar pagka kongresista atbang ni Kongresista Nerissa Soon-Ruiz sa siksto distrito.

Gitug-an ni Osmeña nga naaghat siya nga motabang og kampanya ni Cortes apil na sa kontra ni Lapu-Lapu City Mayor Arturo Radaza tungod kay nasakitan ug naulawan siya dihang napublikar ang kontrobersya sa korupsyon sa overpricing sa pagpamalit og mga decorative lampposts sa DPWH nga gipamutang dinhi sa dakbayan, Mandaue ug Lapu-Lapu atol sa milabay'ng Asean Summit.