Ilegal nga panagat sulbaron - Corro

Giangkon ni Enhinyero Augusto "Dodong Itok" Corro nga kinahanglan gayud nga mahatagan sa dinalian nga kasulbaran ang padayon karon nga paghitak sa illegal nga matang sa pagpangisda sa kadagatan sa lungsod sa Daan Bantayan.

Si Corro mitug-an sa mga tigbalita nga usa kini sa dakong problema karon diha sa lungsod sa Daan Bantayan nga alang kaniya nagkinaghanglan gayud sa dinalian nga pagtagad.

Matod pa ni Corro nga kaniadto ang lungsod sa Daan Bantayan maoy giila nga adunay abundang suplay sa isda.

Nakahatag usab kini sa tubag sa panginahanglan sa gagmay'ng mga mangingisda nga mulopyo sa lungsod.

Apan matud pa ni Corro nga gumikan sa pagsulod sa mga nalambigit sa illegal nga pangisda nag-antos karon ang katawhan sa lungsod sa Daan Bantayan.

Nagkanayon si Corro nga usa kini sa problema nga wala gayud hatagi sa igong pagtagad sa mga namunuan karon sa lungsod.

Midugang si Corro nga adunay mga mulopyo sa lungsod nga mananagat nga adto nalang sa laing lugar mohimo sa ilang pagpanagat.

Gipasabot ni Corro kinsa nagtinguha karon pagdagan pagka mayor sa lungsod sa Daan Bantayan nga usa gayud kini sa iyang nakita nga kinahanglan gayud mahatagan sa igong pagtagad.

Lain usab nga iyang nakita mao ang paghatag usab ug ayuda niadtong mga mangingisda nga wala makatabang ug ayuda sa kagamhanan sa lungsod.