Motabang unta sa gitulis gipusil

Patay ang batan-ong lalaki human napusilan dihang tabangan unta niini ang usa ka babaye nga gitulis sa dalan M.L. Quezon, Maguikay, Mandaue sa miaging kaadlawon.

Si P02 Rey Manatad miila sa namatay nga mao si Julius Brigoli, 23, ulitawo nga taga barangay Umapad, Mandaue.

Matud pa ni PO3 Manatad nga si Joy Aniñon, 20, dalaga nga nagpuyo sa maong dapit gitulis sa duha ka lalaki samtang naglakaw pauli sa ilang panimalay.

Si Brigoli nga naglakaw sa maong dapit kuyog sa mga barkada nakamatikod sa pagpanulis ug dali unta nga mihamag sa pagluwas kang Aniñon apan gipusil kini sa dughan.

Dali nga gitabang sa mga kauban si Brigoli kinsa nagkadugo na ang kalawasan ug gidala sa Cortes General Hospital apan gideklarar kining patay na sa mga doktor.

Dugang pa ni P03 Manatad nga si Aniñon miingon nga nasakiyo gayod sa duha ka wala mailhing tulisan ang iyang mahalon nga cellphone ug pitaka nga may kuwarta.

Si PO2 Manatad miingon nga nagpadayon karon ang ilang pakisusi alang sa pag-ila sa mga armadong tulisan kinsa naglihok na karon sa nagkadaiyang dapit sa dakbayan sa panahon sa kagabhion.