Pogado uyon i-regulate ang PUJ may reserba

Uyon si Antonio Pogado, ang lider sa Nagkahiusang drayber sa Sugbu (NADSU) nga i-regulate sa kagamhanan sa dakbayan sa Sugbu ang mga pasaheroang Public Untiliy Jeep (PUJ) nga adunay mga ligid nga ibutang sulod sa ilang jeep de pasaheroan.

Kini maoy gipadayag ni Pogado subay usab sa lakang ni konsehal Arsenio Pacaña nga nag-awhag karon sa buhatan sa City Traffic Operations Management (CITOM) nga susihon ang mga de pasaheroan jeep gumikan kay tataw kaayo nga way pagtagad ang mga drayber ug operators sa kahasol nga nahatag niini ngadto sa sumasakay nga maglisod na hinuon sa ilang paglingkod gumikan kay magbabag man ang mga reserbang ligid atol sa ilang paglingkod.

Matud pa ni Pogado nga dako siyang uyon niini nga susihon sa CITOM ug i-regulate sa dakbayan gumikan kay tataw man usab nga nakahasol gyud kining mga reserbang ligid kun ibutang pa sa sulod sa ilang gipamasaheroan.

Hinuon iyang giklaro nga ang maong proposal magkinahanglan pa kini sa usa ka konsultasyon o tigom uban sa mga operators ug drayber gumikan kay gusto usab sila nga i-specify ang konseho kun asa gyud ipamutang og balhin ang mga reserbang ligid.