Goons sa kabukiran gihimakak ni Guardo

Hugtanong gihimakak ni kanhi Cebu City Sports Commissioner Jonathan Guardo ang mga pasangil nga nang-hire kini og mga armadong tawo aron mangharas sa mga lider sa Bando Osmeña Pundok Kauswagan (BOPK) sa mga bukirang barangay dinhi sa dakbayan.

Atol sa press conference nga gipatawag ni Guardo kagahapong adlawa giangkon niini nga duna siyay mga tawo nga gisugo sa pagpatungas sa mga bukirang barangay apan ang katuyoan niini mao ang pagpanghatag og mga tambal sa sakit nga arthritis.

Si Guardo nga maoy molansar atbang ni Kongresista Antonio "Tony" Cuenco mipasabot nga wala na kinahanglana nga mag-hire pa siya og mga "goons" tungod kay malinawon ang eleksyon dinhi sa dakbayan hinungdan nga wala siyay angay'ng kabalak-an.

Nasayran nga si Sudlon-I barangay captain Dante Tabucal maoy mipublikar sa lima ka armadong tawo nga nasigpatan niining nagsuroy suroy sa ilang lugar nga gituohan nilang sinugo og politiko.

Kini maoy hinungdan nga mimando dayon si Mayor Tomas Osmeña pagpadala og dugang pwersa sa mga polis sa mga bukirang barangay aron mapatunhay ang kahusay ug kalinaw sa maong lugar nonot niining nagsingabot nga piniliay karong bulan sa Mayo.