Kini maoy gibutyag ni Sr. Supt. Patrocinio Comendador, direktor sa CCPO atol sa pakighinabi sa Banat News kagahapon.
Matud pa sa opisyal ilang kasuhan si Gerjan Manago og paglapas sa Section 11 Article II sa R.A. 9165 human gikatahong nakuhaan kini sa iyang posesyon og gibana-banang lima ka gramos nga gidudahang shabu dihang siya gidakop niadtong milabay'ng Biyernes sa gabii diha sa dalan Panagdait sa Kasambagan.
Si Gerjan maoy gidudahan sa mga polis ang local kontak ug posibleng mao say "mastermind" sa maong suway pagtulis nga miresulta hinuon sa kamatayon sa usa sa mga tulisan nga si Rico Lumantas, kinsa giingong sakop sa MIG9 sa Zamboanga City dihang naatlan nga si PO2 Antonio Din sa MPG diha sa sulod ug nagpaabot sa iyang torno nga matupihan.
Si Din natapsingan sa iyang walang pulso, kumagko ug likod niadtong tungura human makigsinukliay og bala kang Lumantas. Duha sa iyang tulisan ang nakaeskapo niadtong tungura.
Sumala pa sa kapolisan ang tulo ka mga tulisan diha mibisita kang Manago sayo pa nianang adlawa ug si Manago usab ang mihatag kanila ug katulgan, pagkaon ug ingon man ang paghatud kanila sa pantalan atol sa ilang pag-eskapo.
Matud pang Comendador ang kasong robbery ug physical injury posibleng maulahi ug dyutay sanglit padayon pang gitigum ang mga ebidensya ug mga pamahayag sa mga biktima ug testigos.
Niadtong pagkahitabo sa tulis duha ka kustomer nga sila si Oscar Layasan ug Fiona Jago ang nakuhaan og cellphone, pitaka ug kwarta.
Sumala pang Comendador mahimong principal suspect si Manago tungod sa 'indispensable cooperation' niini sa pagtulis subay sa "conspiracy theory" nga "the act of one is the act of all."