Grade 1 gitabangan og lugos sa 2 ka bata

Usa ka Grade One nga tinun-an sa elementarya ang gitabanga'g lugos sa duha ka menor de edad nga mga batan-on, usa sa mga suspek iyang ig-agaw ug ang usa bag-uhay pang mieskapo gikan sa Regional Rehabilitation Center for Youth sa lungsod sa Argao.

Ang biktima nga 11 anyos napalgan sa kapolisan diha sa kalibunan 50 metros ang gilay-on gikan sa ilang balay sa gipuy-an barangay sa lungsod sa Badian pasado alas 3 na sa hapon human kini makit-i sa usa sa mga silingang nitabang og pangita kaniya.

Si PO2 Emmanuel Caballero, desk officer sa Badian police station sa pakighinabi sa Banat News nagkanayon nga niadto pang Biyernes pa sa gabii wala makauli ang biktima kinsa nananghid sa mga ginikanan nga mopalit og papel.

Ang mga silingan sa biktima ug mga kabanay mitabang sa pagpangita kaniya hangtud nga siya nakit-ang nag-ubo sa kalibunan nga wala nay karsones ug panty nga naputos og bun-og ang kalawasan ug nagkadugo ang kinatawo.

Ang silingan sa biktima nga nakakita kaniya daling mipahibalo sa nila ni SPO3 Rufino Tabañag kinsa maoy nangulo sa mga mirespondeng polis.

"Pag-abot didto makasulti pa ni siya pero dili na makatindog kay daghan kaayog bun-og," asoy pang Caballero kinsa nagtuong misukol gyud ang biktima sa mga suspek.

Ang biktima daling gidala sa Badian District Hospital diin kini napamatud-ang gilugos, ang biktima mitug-an usab sa nahitabo ug misugilon kung si kinsa ang milugos kaniya.

Ang suspek nga eskapo sa RCCY sa Argao naaresto dayon diha sa ilang balay dili kaayo layo sa balay sa biktima samtang ang ig-agaw sa biktima nga menor usab diha na madakpi sa barangay Bato sa samang lungsod samtang nitabang sa pagpangopras og lubi.

Sumala pang Caballero niadto rang adlaw'ng Biyernes mieskapo sa RCCY ang usa sa mga suspek. Usa palang ka bulan kini gikan nabilanggo sa RCCY tungod sa kasong pagpangawat diha sa ilang barangay.

Nianang pagkagabii sa adlaw'ng Biyernes gidudahang kini maoy mitintal sa ig-agaw sa biktima nga kini lugoson.

Kasong paglugos ang gikatakdang ipasaka karong adlawa batok sa mga suspek.