Deadline sa ITR sa BIR karong Abril 16

Misugod nag paningil ang taga Bureau of Internal Revenue (BIR) sa mga magbubuhis sa pagsang-at sa ilang income tax returns aron kalikayan ang paghuot na usab sa mga magbubuhis unya sa Abril 16 nga deadline.

Matud pa ni BIR Commissioner Jose Mario Buñag nga kinahanglang makakolekta ang BIR sa ilang gitarget nga P730 bilyones karong tuiga aron ikasumbalik usab kini sa gobyerno ngadto sa mga lalawigan, siyudad, kalungsuran ug kabarangayan sa nasud pinaagi sa mga proyekto sa panginabuhi ug inprastraktura.

Matud pa ni Buñag nga ang gipadak-an nga Internal Revenue Allotment IRA sa lokal nga kagamhanan gisandig sa makolekta sa gobyerno diha BIR.

Ang maong hangyo gipadangat usab ni Buñag ngadto sa mga propesyonal, negosyante, mga organisasyon sibika ug sa eskuylahan aron makakolekta og dako nga buhis ang gobyerno kay mao kini igasto sa mga palapdan ug tukorong mga karsada, taytayan, mga edipisyo sa eskuylahan, pamalit og tambal para sa maayong panglawas ug uban pa.

Busa alang kang Buñag kinahanglang mobayad gyud sa hustong buhis ang tanan.

Ang mga bangko usab nga gitugutan sa BIR nga makakolektag buhis, giawhag ni Buñag nga modawat bisan pa sa buhis sa mga dili nila kliyente.

Kini aron pagsiguro nga matigom ang tanang buhis nga ibayad ngadto sa gobyerno pinaagi sa bangko ug mga buhatan sa kagamhanan sa tibuok nasud.

Ang BIR may 119 ka revised district office ug 19 ka mga revenue regional office sa tibuok nasud.