Sakop sa Alayon Party nanumpa sa Kampi

Partido Alayon ug Kampi nagkahiusa kagahapon diin sa gipahigayong tapok-tapok sa mga lider sa unang distrito sa Sugbu gipahural ni Kongresista Eduardo Gullas ang mga lider sa Alayon ngadto sa Kampi.

Ang maong kalihukan gipahigayon diha sa White Gold House Restaurant niining dakbayan.

Ang Alayon ug Kampi nagkahiusa para mohatag og susporta sa mga kandidato sa national ug lokal nga mga sakop sa maong mga partido.

Si Gullas kinsa tsirman usab sa Kampi sa unang distrito ang mipahural nila ni Valdemar Chiong, Mayor sa lungsod sa Naga ug ang iyang Bise nga si Delfin Senior, Eduardo Selma, Mayor sa lungsod sa Minglanilla ug ang iyang Bise nga si Elanito Peña, Lionel Bacaltos, konsehal sa lungsod sa Sibonga, Cocoy Enad, Bise Mayor sa lungsod sa San Fernando, Roger Montesclaros, Bise Mayor sa Carcar, Bokal Julian Daan Bacus ug Juan Bolo, Estanislao Husayan, konsehal sa San Fernando, Rey Acoda, konsehal sa Sibonga, Mayor Socrates Fernandez sa Talisay ug ang iyang Bise nga si Aberdovey Belleza ug sa mga kapitan sa mga barangay sa unang distrito.

Si Kongresista Nerissa Soon Ruiz, national Vice President sa Kampi ang misaksi sa maong paghural.

Si Gullas nagkanayon nga si Presidente Gloria Macapagal Arroyo miawhag kaniya ug ni Ruiz nga makiglambigit sa Kampi hinungdan nga iyang gihiusa ang Alayon ngadto sa nahisgutang partido.

Gibutyag sa Kongresista nga ang Kampi partido ni Arroyo ug daku siya og investment sa presidente.

Si Gullas miawhag usab sa mga miyembro sa duha ka partido nga sabotan nila ang mga kandidato sa pagka-senador nga ilang suportahan.