Mga polis 'mikulata' sa Akrho

Mga polis sa Talisay kinsa misikop sa usa ka sakop sa Alpa Kappa Rho (Akrho) gipasanginlang mikulata sa dinakpan.

Ang pamilya sa suspetsado gikatahong mopasaka og reklamo batok sa mga polis.

Kahinumduman nga si Wilbert Cabajar 27-anyos taga Sitio Bahadas, Barangay Tabunok sa nahisgutang dakbayan kinsa sakop sa nahisgutang fraternity suspetsado sa pagpamusil ni James Ryan Cabañero, 22, residente usab sa maong lugar sa milabay'ng adlaw tungod kay nagdumili kini og pasakay sa iyang traysikad ngadto sa suspetsado.

Kagahapon ang igsuon ni Cabañero miduso na og kaso batok ni Cabajar.

Si PO2 Joel Rosales polis sa Talisay kinsa usa sa misikop ni Cabajar mibutyag kagahapon sa Banat News nga aduna silay nabating taho nga pasakaan sila og kaso sa pamilya sa suspetsado kinsa gipasanginlan silang mikulata niini.

Gibutyag ni Rosales nga nadapatan nila si Cabajar tungod kay misukol kini dihang ilang gisikop ug misuway pa kini og pusil sa iyang kauban nga si PO3 Arnold Damasco apan swerte lang kay wala makabuto ang pusil sa suspetsado hinungdan nga nahitabo ang linayogay.

Matud ni Rosales nga usa ka residente sa lugar ang misugat kanila dihang nagpahigayon sila og roving diha sa Sitio Mananga kabahin sa usa ka tawo nga nagdala og armas ug gitudlo sa maong tawo si Cabajar kinsa adunay duha ka laing kauban nga nag-inom.

Ang mga polis nagpaila sa ilang kaugalingon ug gimanduan si Cabajar nga ipataas ang iyang T-shirt apan naghinayhinay kini og kuot sa iyang likod ug mihulbot og pusil dayon pusil ni Damasco.

Si Rosales mipasangil nga si Cabajar suspetsado usab sa pagpanulis, panablig og asido sa tulo ka tawo diin duha sa mga biktima gikatahong mga sakop sa Trihedron fraternity ug pagpusil patay sa usa ka "Stanley" kinsa gikataho usab nga sakop sa Trihedron.

Si Supt. Romeo Perigo, hepe sa kapolisan sa siyudad nagkanayon kagahapon sa Banat News nga huwaton nila kun mopasaka gyud og kaso ang pamilya ni Cabajar diin ila kining tubagon.

Matud ni Perigo nga gi-follow-up pa nila karon ang pamilya sa mga nabiktima ni Cabajar para moduso usab kini og reklamo.