P2.4 trilyones infra project ipatuman hangtod 2010

Mokabat sa P2.4-trilyones ang proyektong inprastraktura nga gitinguha sa administrasyon ni Presidente Gloria Macapagal Arroyo nga mapatuman hangtud sa tuig 2010.

Kini ang gipahibawo ni Sec. Cerge Remonde isip National Overview of the Infrastructure Program for the Philippine Super Regions atol sa Government Infrastructure Forum sa Sugbu kagahapon isip siya ang chairman sa Infrastructure Monitoring Task Force.

Matud pa ni Remonde nga 87 ka dagkung proyekto ang ila karong gimonitor lukop nasud diin 33 niini alang sa Central Philippines.

Ang pagsaka sa pondo sa panudlanan gikan sa P816.2-bilyones sa tuig 2005 ngadto na sa P978.7-bilyones sa tuig 2006 ug pagminus sa fiscal deficit pinaagi sa pagsaka sa koleksiyon sa buhis ang nakatukmod sa gobyerno sa pagpatuman og dagkung proyekto.

"Now, we have the money to implement the next phase of economic reform, which is what the President termed as social payback. Now, we are bringing back to the Filipino people the benefits of our fiscal reforms," nagkanayon si Remonde.

Ang mga proyekto naglangkub sa mga karsada, pantalan, ayuda sa panguma, patubig, elektrisidad, panginabuhian, ug mga tugpahanan tumong usab sa paghatag og daghang trabaho sa katawhan.

Karong tuiga, ang kagamhanan nigahin og P170-bilyones nga capital outlay nga maoy 15 porsiyento sa kinatibuk-ang budget og P120-bilyones niini alang sa mga proyektong inprastraktura.

Nanawagan si Remonde alang sa ayuda sa pribadong sektor aron makab-ot ang maong mga damgo sa nasudnong kagamhanan.