Moratorium vs capitol libkason gisupak ni Paul

Dakong supak si Cebu City Planning Officer Nigel Paul Villarete nga libkason ang pagdeklarar og moratorium sa pagtukod og mga infrastructure project diha sa Banilad-Talamban area.

Ang pamahayag ni Villarete misuporta sa deklarasyon ni Mayor Tomas Osmeña nga kinahanglang sutaon una ang sitwasyon sa trapiko sa maong dapit inig bukas sa klase karong Hunyo.

Si Villarete ug Citom executive officer Arnel Tancinco maoy mihatag og baruganan ngadto sa mga sakop sa konseho sa dakbayan nga ang pagmugna og dugang infrastructure project sa Banilad makapasamot sa traffic congestion.

Ang mga opisyal sa Kapitolyo mipadala na og pormal nga awhag - pinaagi sa usa ka resolusyon sa Provincial Board - nga nag-awhag sa mga sakop sa konseho nga ilibkas ang pagdeklarar nila og moratorium sa pagmugna og proyekto diha sa Banilad.

Giplano sa Kapitolyo nga magmugna sila og Ciudad Project - usa ka commercial district - diha sa luna sa probinsya nga nahimutang sa giukopahan kanhi sa Cebu International School.

Apan ang suwat sa Kapitolyo wala kaayo hatagi og pagtagad sa mga konseho sa dakbayan atol sa ilang sesyon kaniadtong Miyerkules.

Ang pagdeklarar sa konseho og moratorium pagmugna og mga infrastructure project diha sa Banilad maoy nakapahaling og kasuko ni Gobernador Gwendolyn Garcia nga mihukom pagsirado sa access road duol sa Fuente Osmeña nga nahimutang sa yuta sa probinsya.

Dunay pagduda nga ang gamot g'yod sa pagdeklarar og moratorium sa pagmugna og infrastructure projects diha sa Banilad mao ang pag-ukon-ukon sa kapitolyo pagsulod og kasabutan kabahin sa land swapping tali sa City Hall.

Ang gisugyot nga land swapping gitumong ni Osmeña aron ang namuyo sa yuta sa probinsya nga ania sa dakbayan dili na mapapahawa gikan sa ilang gipuy-an.