PO2 Din hataga'g pasidungog, ganti

Irekomendar ni Cebu City Police Office director, Sr.Supt. Patrocinio Comendador nga hatagan og medalya, spot promotion ug commendation si PO2 Antonio Din kinsa nakapatay og usa ka gidudahang tulisan diha sa Talamban niadtong milabay'ng gabii.

Si Comendador nagkanayon nga aron pag-motivate ug maayong trabaho sa ubang mga polis sa CCPO buot niyang mahatagan og pasidungog si Din dili lang sa iyang level kundili lakip na sa Police Regional Office 7.

Si Din maoy nakapatay kang Rico Lumantas,57, nga taga Zamboanga City kinsa uban sa duha pa nakaikyas ang mga tulisang misuway og tulis sa Jonas Borces Beauty Studio sa sitio Tigbao sa Talamban.

"Wala na ta mag-expect ana kay trabaho man ning ato, kung tagaan man ko og commendation ang ako rang mga labaw maoy mag-igo ana pero dako sad akong pasalamat ana," asoy pang Din sa mga tigbalita kagahapon.

Si Din miangkon nga gikuyawan siya sa hitabo sanglit mao pa kini ang labing unang higayon nga nakaengkwentro siya sukad nga siya nasulod pagkapolis niadtong 1997.

" I would recommend him for a medal at the PRO7, pwede sad nato siyang i-recommend for spot promotions because based on the facts of the incident commendable ni for spot promotion because beyond the call of duty naman," asoy pang Comendador.

Si Din niadtong tungura nagpaabot sa iyang torno sa pagpaputol sa iyang buhok dihang misulod ang mga suspek ug mideklarar og tulis apan wala nila damhang usa sa mga kustomer polis.

Nagtuo si Din nga swerte ray nag-abay niya kay bisan mas daghan og bala ang mga suspek mga tapsing ray iyang nahiaguman, apan dako ang iyang pasalamat ang kanunay'ng praktis sa paggamit sa iyang armas nga rekisitos sa CCPO karon.

Mibahad si Comendador sa mga dautang elemento nga andam kanunay ang CCPO sa pagpuo kanila kung sila masakpan.

"CCPO mean business, they can do whatever they want, but we will not hesitate to shoot them and even kill them basta legitimate lang," panapos pa sa opisyal.

Samtang si Mayor Tomas Osmeña mipahibalong dunay madawat nga P50 mil si Din tungod sa gipakita niining kaisog ug kaabtik sa paghimo sa iyang trabaho bisan kini off-duty na.

Laing tumong sa mayor aron madasig ang ubang mga polis ug motuman kini sa ilang katungdanan paggukod sa mga notadong kriminal.

Naandan na sa kagamhanan sa dakbayan nga mohatag og ganti ngadto sa mga polis nga maka-neutralize o ba kaha makapatay og tulisan ilabi na niadtong mga off-duty na nga mga polis.