Napatay nga tulisan 'asset'

Gisusi karon sa Cebu City Police Office ang pagkatawo sa napatay nga gidudahang tulisan sulod sa Jonas Borces Beauty Studio sa Tigbao, Talamban niadtong milabay'ng gabii kung tinuod ba kining sakop sa Military Intelligence Group sa Intelligence Service of the Armed Forces of the Philippines (ISAFP).

Ang napatay mao si Rico Lumantas, 57 anyos, taga Clarian, Zamboanga City, ug giingong sakop usab sa CAFGU sa maong dakbayan kaniadto.

Si Lumantas napusilan ni PO2 Antonio Din, sakop sa Mobile Patrol Group nga residente sa Bacayan sa maong barangay ug niadtong tungura off-duty ug nagpaabot sa torno aron mopatupi sa iyang buhok.

Si Din sa pakighinabi sa mga tigbalita kagahapon mitug-an nga samtang siya nagpaabot dihay duha ka lalaking misulod sa maong parlor, ang usa milahos sa tumoy ug ang usa diha sa pultahan.

Matud pang Din nga ang lalaki diha sa tumoy kalit nga mideklarar og tulis dayong tion og pistola ug mimandong pahapaon ang mga tawo sanglit cellphone, alahas ug kwarta ray ilang tuyo.

"Nisulti tong usa og 'Tulis ni, hapa lang mo tanan!,' nihapa sila nihapa nalang sad ko pero akong gihinay-hinay og ibot akong armas, nakit-an man ko adtong tawo sa unahan gipusil ko gikasa nako akong pusil nitago ko sa sofa dayon nibawos ko," asoy pang Din.

Ang suspek naigo diha sa ulo ug ubang parte sa kalawasan samtang si Din swerteng nakaangkon og mga tapsing diha sa walang pulsohan, kumagko sa tuong tiil ug gamay'ng samad nga dunay lagom sa likod.

Matud pang Din ang sofa nga kutson posibleng maoy nakatabang sa pagpugong sa bala ug naglisod ang suspek pagpangita og clear target kini bisan paman kalibre 45 ang pistola niini nga high cap ang magazine ug duha ra ka metros ang ilang gilay-on.

Ang suspek matud pang Supt. Patrociño Comendador nakapabuto pa og 16 ka bala, base usab sa narekober nga mga basiyo diha sa gibarugan niini.

Samtang ang ikaduhang suspek gikatahong misuway pa og pusil kang Din samtang ang polis nag-reload sa iyang armas apan wala makaigo, sumala pa sa mga kustomer milusot kini sa buak nga bildong pultahan gani nakit-an kining nasamad sa liog.

Sa wala pa mahitabo ang pinusilay, nakuha na sa usa sa mga suspek ang Nokia N71 cellphone, duha ka pitakang may sulod nga P300 ug P700 nila ni Oscar Layasan,34, taga Basak, Lapulapu ug Fiona Jago,23, taga Binaliw III sa Talamban.

Narekober sa kapolisan ang usa ka ID ni Lumantas isip usa ka confidential agent sa ISAFP, kopya sa mga ngalan sa mga CAFGU sa Zamboanga ug Memorandum Receipt sa pistola nga kalibre 45 ug mga bala.

Si Chief Inspector Rex Derilo sa Criminal Investigation and Detection Group 7 kinsa naatol nga naagi sa dapit dali usab nga miresponde ug nag-uban ni Din sa paggukod sa mieskapong tulisan nga gituohang misakay og usa ka motorsiklo nga gimaneho og laing kauban apan pakyas ang ilang tinguha kay dali kaayong nakasibat ang duha.