Basketball boards ni Tom sa Lahug gipangtangtang

Barangay Kapitan Mary Ann delos Santos sa Lahug gipasanginlang nanangtang og mga basketball board nga gidonar ni Mayor Tomas Osmeña sa mga molupyo sa maong barangay.

Usa ka Perla Guillen, molupyo sa Golden Valley Homes,Lahug kinsa nitambong sa press conference ni Osmeña kagahapon nitug-an sa mga tigbalita nga gitangtang ang maong mga basketball board ug gipang-ilisan og board nga dunay pangalan ni delos Santos.

Gitug-an ni Guillen nga ang presidente sa ilang asosasyon maoy nagsugo pagpatangtang sa basketball board nga gidonar sa mayor sa ilang lugar.

Gibutyag ni Guillen nga wala sila hatagi og balidong katarungan sa ilang presidente sa asosasyon kon nganong gitangtang ug gipailisan ang maong basketball board gikan sa mayor nga unta lig-on ug dili pa kini guba.

Si Osmeña sa iyang bahin hugtanong nihimakak sa gipalakaw nga mga tabi-tabi nga wala siyay mga proyektong nahatag sa Lahug tungod lang kay kontra partido niini si kapitan delos Santos nga kaalyado kaniadto ni kanhi mayor Alvin Garcia.

Gibasihan sa mayor ang pagpasemento sa tanang kalye diha sa Nivel Hills iyang gihimo bisan paman og walay pormal nga request nga iyang nadawat gikan sa mga molupyo sa maong lugar.

Gani gihisgutan sab sa mayor ang nagubot nga landswap deal nga kon mahinayon na ang maong transaksiyon subra sa 50 porsiyento sa kapin 5 mil ka mga binipisyaryo niining makapahimulos mga molupyo sa Lahug.

Apan si delos Santos nga gikuhaan og reaksyon bahin sa pasangil kusganong mihimakak niini.

Si Delos Santos sa pakighinabi niini sa Banat News kagahapon nagkanayon nga dili tinuod ang pasangil batok kaniya ug wala siya'y bisan usa nga proyekto sa mayor diha sa ilang barangay nga iyang gihilabtan.

Ang kapitan mihagit ni Osmeña nga makig-abot sa usa ka lugar ug padalhon niya og tawo ang mayor nga neutral aron maoy magpamatuod kung tinood ang mga pasangil batok kaniya.

Si delos Santos midungag nga moluwat siya sa iyang katungdanan kung mapamatud-an ang nahisgutang mga pasangil.