Luigi Quisumbing magkongresista

Tulo ka mga inilang personalidad ang gipaabot nga mag-atbang sa pagka-kongresista sa ikaunom nga distrito sa lalawigan sa Sugbu sa eleksiyon karong Mayo 14.

Pormal nga ipahibawo ni Bokal Gabriel Luis "Luigi" Quisumbing karong adlawa ang iyang pagpapili sa maong posisyon atol sa senemanang Kapihan ni Ate Glo nga gidumala ni Elberto Emphasis nga mabati sa sibyaanan sa DYLA.

Si Quisumbing modagan ubos sa partido Lakas-Christian Muslim Democrats human siya gitudlo ni House Speaker Jose de Venecia isip district chairman sa partido.

Unang nisulod sa politika si Quisumbing isip sakop sa hunta probinsiyal sa ikaunom nga distrito niadtong eleksiyon sa tuig 2004.

Samtang gikatakda usab nga ipahibawo ni kanhi kongresista ug kanhi Gob. Vicente "Tingting" dela Serna ang iyang pagdagan sa pagka-kongresista.

Usa sa sinaligan ni dela Serna nipahibawo sa Banat News nga atol sa programang Arangkada ni Leo Lastimosa sa DYAB karong adlawa ideklarar ang iyang kandidatura.

Wala pa hinoon matino kon unsa ang partido ni dela Serna kinsa nahimo na nga kongresista sa ikaunom nga distrito niadtong 1989 dayun napiling gobernador sa tuig 1992 ug napilde na siya sa tuig 1995 batok ni kanhi Gob. Pablo Garcia.

Una nang nipahibawo si Kong. Nerissa Soon-Ruiz sa pagpasubli alang sa katapusan niyang termino ubos sa partido Kabalikat ng Malayang Pilipino isip siya ang regional chairperson sa Kabisay-an.

Si Ruiz alalay kanhi ni Quisumbing apan nakig-uli na kini sa mga Ouano sa dakbayan sa Mandaue nga dugay niyang gikabangi sa politika.