Notadong pusher 'sikop sa PAIDSOTG

Gironda sa hiniusang puwersa sa Provincial Anti Illegal Drugs Special Operation Task Group (PAIDSOTG) sa Cebu Provincial Police Office, Philippine Drug Enforcement Agency (PDEA) 7 inabagan sa kapolisan sa San Francisco Camotes ang panimalay sa usa ka notadong drug pusher niadtong Huwebes sa buntag sa Consuelo sa sama nga lungsod.

Nangulo sa pagpangronda si Insp. Rolando Ong, hepe sa PAIDSOTG armado og search warrant nga giluwatan ni RTC Branch 15 Judge Fortunato De Gracia.

Si Jose Latonio, hingkod ug residente sa naasoy'ng lugar kinsa nasikop ug nakuhaan sa iyang panimalay og lima ka putos nga may sulod sa gidudahang shabu, 40 ka tinfoil, siyam ka lighter, upat ka kandila, upat ka gunting, usa ka kerosine lamp, duha ka clip para repacking, improvised tooter, siyam ka empty pack nga gituohang ang sulod shabu ug P400.00 gituohang halin sa pagpamaligya og shabu.

Segun sa report sa kapolisan si Latonio dugay nang gipanid-an sa kapolisan kabahin sa iyang kalihokan sa giingong pagpamaligya og ginadiling drugas sa ilang lugar.

Ang suspetsado kasamtangan gitanggong sulod sa detention cell sa Cebu Provincial Police Office samtang nagpaabot nga kapasakaan sa kapolisan og tukmang kaso ngadto sa piskaliya. - Rey B. Pasaporte