Opisyal sa PNP namatid og drayber

Usa ka opisyal sa kapolisan ang gireklamong namatid ug misukmag sa usa ka taxi drayber atubangan sa 12 anyos nga batang lalaki nga pasahero sa biktima niadtong milabay'ng Martes diha sa Unit 4, Opra sa Kalunasan.

Ang maong opisyal nga nagranggo og Chief Inspector (ngan gipugngan) apan residente sa maong dapit gipasanginlan sa drayber nga si Enrique Baylosis,58, residente sa Camputhaw .

Sumala pa ni SPO4 Edison Torres base sa police blotter, gireklamo sa maong drayber ang maong opisyal nga kalit lang namatid kaniya.

Human pagpatid gisumbag pa siya niini apan maayo nalang wala kini maigo.

Ang insidente gikatahong nasaksihan sa mismong batang pasahero sa biktima.

Si Inspector Julio Eder, deputy chief sa Guadalupe police station sa pakighinabi sa Banat News mikumpirmar nga dunay susamang reklamong midangat diha sa ilang buhatan.

Matud pa niya wala hinuon ibutyag sa biktima kung hubog ba ang maong polis niadtong tungura ug kung unsay hinungdan nga siya gidagmalan niini.

Wala say nakaila sa mga sakop sa Guadalupe police station sa maong opisyal, sumala pang Eder.

Sumala pang Eder nga ang medical certificate sa biktima nagpakita nga molanat og pito ka adlaw una pa maayo ang mga bun-og nga natagamtaman sa biktima.

Apan base sa patakaran kung moubos sa siyam ka adlaw nga maalim ang usa ka physical injury nga gireklamo sa usa ka tawo adto kini husayon sa barangay level.

Nunot niini girekomendar sa Guadalupe police station ngadto sa biktima nga adto husayon sa barangay Kalunasan ang iyang reklamo.