Upat kasuhan tungod sa kawat og kable

Pasakaan og kasong pagpangawat ang upat ka tawo kinsa suspetsado sa kinawatay og kable sa mga suga ug telepono diha sa South Coastal Road habig sa dakbayan sa Talisay.

Ang mga suspetsado giila sa mga polis nga si Rizalito Alaba alyas "Lemuel", 35-anyos, Sylvia Leda, 40, Zoriel Bitos, 29 ug Brendo Ongayo, 35, mga residente sa Sitio Oregano, Barangay Lawaan II sa nahisgutang dakbayan.

Ang upat nagtingkagol karon sa Talisay police detention cell human naaktohi sa mga polis nga nagdaob og mga kable sa kuryente diha sa balay ni Alaba.

Nasakmit sa mga polis gikan sa mga suspetsado ang duha ka sakong kable sa kuryente, napulo ka kilong bronse, lima ka metros nga kable sa Globelines, usa ka cutter blade ug usa ka gunting.

Kahinumduman nga si Bise Mayor Aberdovey Belleza, tsirman sa kahapsay ug kalinaw sa siyudad miluwat og memorandum ngadto ni Police Superintendent Romeo Perigo, hepe sa kapolisan sa siyudad sa pagpahigayon og higpit nga pakisusi kabahin sa nahitabong kinawatay sa mga kable.

Kahinumduman usab nga ang mga residente diha duol sa South Coastal Road miduso og reklamo ngadto ni Belleza tungod sa pagkapawong sa mga suga sa poste diha sa maong karsada tungod kay ang mga kable niini gipangawat ug nakahatag kini og peligro sa mga motorista.

Niining bag-o lang usab ang mga kliyente sa Globelines nga mga residente diha sa Lawaan mireklamo tungod sa pagkawagtang sa signal sa ilang telepono ug nasuta nga gikawat usab ang kable sa ilang linya.

Si Perigo sa pakighinabi niini sa Banat News kagahapon nagkanayon nga aduna silay mga nadawat nga taho kabahin sa upat ka suspetsado ug daling miresponde ang kapolisan sa theft and robbery section nga gilangkuban nila ni Police Inspector Jaime Santillan, PO2 Erwin Carbonquillo, PO2 Mikee Espina ug PO1 Gelmer Noval.

Matud ni Perigo nga gihikay na nila kagahapon ang mga dokumento para sa kaso nga ilang iduso sa korte batok sa upat.

Ang hepe midungag nga gawas sa upat posibleng aduna pay laing grupo sa kawatan og kable hinungdan nga padayon sila sa ilang operasyon karon para masikop ang uban pang mga suspetsado.