Baruganan sa kababayen-an walay pamolitika

Wala'y pamolitika nga nagpaluyo sa pondok sa kababayen-an sa ilang baruganan sa pagsupak sa tinguhang pagbuak-buak sa lalawigan sa Sugbu.

Gitataw ni Bokal Agnes Magpale atol sa Kapihan sa PIA-7 sa Club Ultima kagahapon diin gituki ang kalihukan sa kababayen-an sa pagsaulog sa Women's Month.

Usa ka resolusyon ang gipasar atol sa ikapito nga Cebu Women's Congress sa Kapitolyo sa niaging semana nga nagsupak sa tinguhang pagbahin-bahin sa Sugbu ngadto sa upat ka probinsiya.

Ang resolusyon kauban sa laing duha ka resolusyon ang gitunol ngadto ni Presidente Gloria Macapagal Arroyo kinsa nitambong sa maong kalihukan.

Gipasabot ni Magpale nga niadto pang niaging tuig niluwat og baruganan ang Provincial Women's Commission sa pagsupak sa balaudnon nga giduso nilang Kong. Simeon Kintanar, Antonio Yapha Jr. ug Clavel Asas-Martinez tumong sa paghimog usa ka probinsiya sa tagsatagsa nila ka distrito.

Ang maong baruganan subling gipadayag sa kababayen-an karong tuiga ug gipaagi na sa resolusyon.

Matud ni Magpale nga bisan si Gob. Gwendolyn Garcia ang ilang tsirman sa komisyon ug ang nipasiugda sa kampanya batok sa Sugbuak, wala magsugo kanila sa pagluwat sa maong baruganan.

"Let's feel the pulse of the women," nagkanayun si Magpale.

Nag-unang hinungdan sa baruganan sa kababayen-an batok sa Sugbuak mao nga mohuyang ang lokal nga kagamhanan sa lalawigan kon mahimo na kining gagmay nga probinsiya.