Tomas mi-atake na ni Mary Ann

Wala pa gani maka-desisyon si Lahug Barangay captain Mary-ann delos Santos kun mohinayon ba og kandidato pagka-mayor dinhi sa siyudad sa Sugbu sa eleksyon karong Mayo, apan gisugdan dayon kini og atake ni Mayor Tomas Osmeña.

Kagahapon atol sa press conference ni Osmeña gihulagway sa mayor nga mapugos gyud og lansar si delos Santos tungod kay nagkinahanglan kini og dakong kwarta nga gastuhon sa iyang amahan nga masakiton.

Giluwatan kining maong pamahayag sa mayor human mahibaw-i niini nga dunay press conference nga gipatawag si Thadeo Jovito "Jonkie" Ouano didto sa pinuy-anan ni kapitan delos Santos kagahapon sa buntag.

Si delos Santos maoy usa sa mga prospect sa Genuine Opposition (GO) dinhi sa dakbayan nga maoy kandidato pagka-mayor atbang ni Osmeña.

Apan gipadayag sa mayor nga wala siya mahadlok bisan si kinsa ang mobarog nga moatbang kaniya sa umaabot piniliay.

"I don't know how to fight a woman, ok ra silang Tingting dela Cerna, IBP, Ecleo kun babaye gani giatay," dugang asoy ni Osmeña.

Hinuon si delos Santos sa iyang bahin nagdumili pagkonpirmar kun molansar ba kini pagka-mayor atbang ni Osmeña tungod kay matud niya moabot ra ang panahon nga magpatawag siya og laing press conference alang sa maong isyu.

Si delos Santos maoy gipahibalo ni Jonathan Guardo, chairman sa Genuine Opposition, dinhi sa dakbayan nga usa sa ilang mga prospect nga kandidato pagkamayor atbang ni Osmeña.