Eleksiyon sa barangay ipa-oktaba ni Pabling kun....

Si kanhi Gobernador Pablo Garcia kinsa naglaraw sa pagpapili pagka- kongresista sa ikaduhang distrito sa lalawigan sa Sugbu naglaraw nga kun buligan siya ug makalingkod sa Ubos Balay Balaoranan iyang unahon sa pagduso ang balaodnon nga i-oktaba ug walay eleksyon sa mga barangay kapitan karong Oktubre.

Matud pa ni Garcia nga kini maoy iyang paninguhaon nga maduso gumikan kay iyang nakita nga dako na kaayo magasto ang gobyerno nga mosangko na hinoon sa pagkahagip-ot sa panudlanan niini.

Sumala pa niini nga gikinahanglan maoktaba gyud ang pagpahigayon sa eleksyon sa mga barangay kapitan karong Oktubre sa ingon ang ubang pundo sa gobyerno magamit pa sa ubang mga importanteng programa sama sa mga basic services.

Matud pa ni Garcia gawas nga iyang ipa-oktaba ang pagpahigayon sa eleksyon karong Oktubre gitinguha usab niya nga kadungagan ang honorarium sa mga barangay opisyal ug mga empleyado.

Gipadayag niini nga mabulahan ang maong barangay opisyal gumikan kay gawas sa dugang suholan iya usab kining pahatagan og dugang mga benepesyo sama sa GSIS, SSS ug sa Pag-ibig

Iyang giklaro nga sa mao unyang balaodnon gusto niya nga ang mga barangay kapitan o opisyal lukop nasud kahatagan kini'g regular nga sweldo sama sa mga regular nga empleyado sa gobyerno nga nagdawatan og ensaktong suholan matag bulan ug uban pang mga benepisyo.