Ex-mayor sa Compostela abswelto sa estafa

Giabswelto sa kasong kalapasan sa Batas Pambansa Bilang 22 kon Bouncing Check Law si kanhi Compostela Mayor Gilbert Wagas.

Nunot niini gimandoan ni Municipal Trial Court in Cities branch 5 Presiding Judge Oscar Andrino si Wagas nga bayaran sa kantidad sa iyang nautang nga kahimanan sa komunikasyon balor og kapin sa P118 mil ngadto sa reklamante nga si James John Ceballos.

Tulo ka kaso ang gipasaka ni Ceballos, tag-iya sa Deacon Enterprises sa may dalan D.Jakosalem dakbayan sa Sugbu batok kang Wagas pipila na ka tuig ang nakalabay.

Kini human niuntol ang mga tseke nga gibayad ni Wagas sa gipalit nga mga handheld radios, radio transceivers, chargers ug mga battery packs.

Giangkon ni Wagas ang maong utang ug ang pag-isyu og tseke sa Bank of the Philippine Island balor og P84,430 ug tseke sa Far East Bank and Trust Company balor og P21,200 niadtong Mayo 15, 1997 apan niuntol kini sa bangko nga hingtungdan gumikan kay walay igong pondo ug sirado na ang account sa laing bangko.

Nasuta sa korte nga pakyas ang reklamante sa pagpahibawo kang Wagas nga niuntol ang tseke samtang nipasalig si Wagas nga mobayad sa maong utang.

Ang pagtubag ni Wagas sa demanda sa reklamante nga mobayad siya sulod sa 45 ka adlaw ang nakapalig-on sa iyang paglingkawas sa kaso.