Lola, apo nadasmagan

Nalandig sa tambalanan ang usa ka lola nga nagkugos sa iyang apo nga lalaki human gidasmagan sa multicab nga giingong gimaneho sa hubog nga drayber ug pagkahuman nibangga pa gyud sa usa ka tindahan sa usa ka Tajao, Pinamungahan, Cebu.

Segun sa report nga midangat sa Cebu Provincial Police Office ang mga biktima naila nga si Leonera Sapio, 65, minyo ug ang apo nga lalaki nagpangidaron og usa ka tuig kapin ug ang naapil og kaangol si Kim Nillama, 24, ulitawo, ang tulo pulos residente sa naasoy'ng lugar.

Ang nakadasmag ug gikatahong nanimahong ilimnom ang baba giila sa kapolisan nga si Richard Costanilla, 58, minyo ug residente ra usab sa maong lugar kinsa nagmaneho sa multicab nga may plakang CLN 481.

Ang kapolisan nakadawat og report sa usa ka concerned citizen ug nagpahibalong dunay nahitabong aksidente.

Si SPO1 Nonilon Estonillo Jr. sakop sa Alert Team maoy miresponde sa nahitaboan ug sa gihimong imbestigasyon, nasayran samtang si Costanilla nagdagan subay sa national road paingon sa dakbayan sa Toledo, kalit lang kining nawad-an og kontrol sa manobela ug misimang sa pikas bahin sa dalan ug mipaingon sa nahimutangan ni Sapio nga nagkugos sa apo ug naigo.

Human maigo ni Costanilla ang duha ka biktima milahos pa kini sa nahimutangan ni Nillama nga naglingkod duol sa usa ka tindahan.

Ang tulo ka mga biktima parehong nakaangkon og daghang samad ug bun-og sa kalawasan human mabagnos sa yuta ug daling gihatod sa Toledo City District Hospital, apan pipila ka gutlo ang nakalabay gibalhin sa Chong Hua hospital sa dakbayan sa Sugbu.

Samtang si Costanilla misibat human sa maong aksidente apan nadakpan sa kapolisan sulod sa panimalay sa iyang igsuon.

Nasuta sa kapolisan nga mi-expire na ang rehistro sa iyang multicab ug ingon man napakyas si Costanilla sa pagpakita sa iyang drivers license.

Sa pagka-karon si Costanilla giditener sulod sa detention cell ug nagpaabot nga kapasakaan og tukmang kaso sa kapolisan.