Gwen subling mibahad

Gisubli ni Gobernador Gwendolyn Garcia nga dili niya suportahan ug sa One Cebu Party ang mga kandidato pagkasenador nga dili mopirma sa covenant batok sa tinguha pagbuak sa Sugbu.

Ang maong pamahayag sa gobernador nahimo dihang nasayran niya nga si Senador Francisco Pangilinan namahayag nga hangtod nga dili pa siya makabasa sa tinuod nga hinungdan nganong dili angayang buakon ang Sugbu magpabilin una siyang dili motandog sa maong isyu.

Sa pagkakaron, nakabintaha si Pangilinan kay sa ubang mga kandidato sanglit kadtong mga kandidatong mipirma sa covenant posibleng di na suportahan sa nagpasiugda sa Sugbuak.

Si Pangilinan usa ka independente, iyang gipasabot nga dili angay nga ang partido sa usa ka kandidato maoy ilang botohan kundili ang kandidato gayud mismo nga may prinsipyo ug abilidad, may baroganan ug responsable ug dili pabalhin-balhin og partido aron lamang botohan sa panahon sa election.

Alang kaniya, si Pangilinan dakog pagtuo nga sa iyang pagka independente, may makasabot ra kaniya sanglit may baruganan ug prinsipyo siyang gibantayan.