Duha ka polis sa CCPO nagkomprontase

Duha ka polis sa CCPO nagkomprontase sulod sa piskalya human gipasanginlan ni SPO3 Alfredo Amaro sa Punta Princesa Police Station ang kapulisan sa Fuente Police Station nga mihulga sa iyang mga higalang babaye nga gitanggong karon sa Fuente Police Station human madakpi niadtong Pebrero 28 sa miaging bulan diha sa may B. Rodriguez St., Cebu City Sitio Maharlika Barangay Sambag ll dakbayan sa Sugbu.

Si SPO3 Amaro miingon nga ang iyang higala nga sila si Edna Ababon ug Mary Busaco mitug-an kaniya nga gihulga sila sa mga sakop sa Fuente Police Station hinungdan nga nabalaka na usab kini karon sa ilang kahimtang sulod sa maong selda. Ang mga akusado misumitir og counter affidavit nga gibutang-butangan lang sila tungod kay didto sila dakpa sa ilang panimalay sa Sitio Hawod Compound, Bulacao Talisay City niadtong tungura ug gidala sa may Fuente diin sila gipasanginlang namalit og ginadiling drogas.

Matud pa ni SPO3 Amaro nga nahinabi sa Banat News nga andam siyang moduso sa iyang affidavit aron sa pagbutyag nga gihulga ang iyang duha ka mga higala nila ni SPO2 Bernabe Cañas Alegado ug mga kaubanan diha sa Fuente Police Station.

Apan si SPO2 Alegado kinsa didto usab sa buhatan sa piskaliya niadtong milabay'ng adlaw mitubag sa maong alegasyon ug miingon nga buot usab niya nga ipabutang sa iyang affidavit nga si SPO3 Amaro maoy nangabugar sa maong mga dinakpan sukad pa niadtong nadakpan ang duha ug mihimakak nga ilang gihulga ang mga babaye.

Human sa maong komprontase si SPO3 Amaro daling mibiya sa piskalya apan si PO2 Alegado mi-akusar kang SPO3 Amaro nga mihulga kanila nga magmahay lang unya sa ilang gihimo nga pagpasaka'g kaso batok sa iyang mga higala.

Hinoon giklaro ni Alegado nga sabutan pa una nila sa iyang mga kaubanan kun moreklamo ba sila niini ngadto sa ilang kadagkuan.