Babaye gipusil sa Bloods

Usa ka babaye naangol human kini pusila sa usa ka wala mailhing lalaki nga gidudahang sakop sa Bloods Gang diha sa dalan Governor Avenue sa Camputhaw niadtong milabay'ng gabii.

Ang naangol giilang si Elizabeth Enriquez,18, residente sa maong lugar kinsa uban sa iyang mga higala nanuroy og lakaw diha sa maong dapit niadtong higayuna.

Wala pa mailhi sa kapolisan kung si kinsa ang nag-inusarang suspek apan giingong midagan kini sa sudlonong bahin sa sitio Lupa sa maong barangay human sa pagpusil kang Enriquez.

Sa imbestigasyon sa Homicide Section si Enriquez uban ni Axl Hernandez ug mga higala naglakaw padulong sa direksyon sa University of the Philippines sa Lahug.

Gikatahong kalit nga may mipakang buto sa armas dili layo sa ilang gilakwan apan si Enriquez mitakingking sa kasakit sa walang tiil ug diha nalang niini nasayran nga napusilan kini.

Dali siyang gihatud sa tambalanan sa iyang mga higala samtang ang suspek miikyas dayon sa lugar.