Lolo naghikog

Patay ang usa ka lolo human kini naghikog pinaagi sa paghigot og pisi diha sa iyang liog sulod sa iyang kuwarto sa miaging gabii didto sa East Poblacion, Poro isla sa Camotes.

Ang naghikog tungod kay nangluod nga wala tugoti mobakasyon giila sa kapolisan nga si Climaco Pesquera, 78, minyo ug retired public school teacher ug residente sa sama nga lugar.

Segun sa report sa kapolisan pasado alas 7:30 sa gabii si Pesquera nakit-an sa iyang katabang babaye nga si Maria Lina Garciano nga dunay gihigot nga pisi sa iyang liog sulod sa kuwarto ug wala nay kinabuhi.

Sa pagsusi sa katabang nasuta nga ang tumoy sa pisi diha sa liog gibanting ngadto sa cabinet ug naglingkod ang posisyon sa namatay.

Ang kapolisan daling misusi sa panimalay ni Pesquera ug ilang naabtan nga giliwag na ang patay'ng lawas ni Pesquera sa katabang nga si Garciano kay gisuwayan unta sa pagtabang apan walay nahimo.

Si PO1 Patrick Mangubat nga nahinabi sa Banat News niingon nga base sa ilang dugang nga pakisusi nasayran sa wala pa mapalgi ang patay'ng lawas ni Pesquera ang asawa ug katabang naglingkod sa silong sa panimalay.

Gisugo sa asawa ang katabang nga ipaadto kay mangatulog na sila niadtong higayona apan maoy naabtan sa katabang nga naghikog na diay kini.

Matud ni PO1 Garciano nga nahiubos ug naguol si Pesquera nga wala tugoti sa iyang asawa human mananghid kay gustong mobakasyon sa dakbayan sa Sugbu.

Gituohan sa kapolisan nga dunay diyutay nga wala pagsinabtanay sa magtiayon ug kini maoy ilang gituohang hinungdan nganong naghikog si Pesquera.

Matud ni PO1 Mangubat nga wala na lang ipailawom sa autopsy ang patay'ng lawas ni Pesquera kay kombinsido ang mga kabanay niini nga naghikog gyud.