'Notadong' pusher sa Duljo nadakpan

Arestado ang usa ka gidudahang notadong drug pusher diha sa sitio Vampire sa Duljo-Fatima atol sa usa ka raid nga gilusad sa hiniusang puwersa sa Criminal Investigation and Intelligence Branch ug Special Weapons and Tactics kagahapon sa kaadlawon.

Ang gidakop mao si Jimmy Pagusara, hingkod ang panuigon ug residente sa maong lugar, sumala pang Supt.Pablo Labra usa ka level two si Pagusara.

Ang usa ka level-two drug pusher sumala pa sa kapolisan makabaligya og dili momenus 200 gramos nga shabu hangtud usa ka kilo matag semana.

Ang kapolisan armado og search warrant nga giluwatan ni RTC branch 15 Judge Fortunato de Gracia,Jr. tungod sa paglapas sa Section 11 Article 2 sa RA 9165 kung paghupot og iligal nga drogas.

Nakuha sa kapolisan ang tulo ka medium size nga paketeng may sulod nga gidudahang shabu, mga aluminum foil gikan sa iyang balay.

Gawas sa maong drogas, nasakmit usab sa kapolisan ang usa ka molimoli ug usa ka video karera diha sa maong lugar.