Housing program sa nasunugan ilusad

Gitinguha nga ikapatuman ang housing program sa kagamhanan sa dakbayan sa Mandaue alang sa dinaliang pagpabalik sa liboan ka lumolupyo nga biktima sa sunog sa Guizo ug Mantuyong nga temporaryong gipahimutang sa mga evacuation center.

Ang Barangay Affairs Coordinating Office head sa dakbayan nga si Thadeo Jovito "Jonkie" Ouano miingon nga ang housing program sa Gawad Kalinga sa Couple for Christ mihimo karon og pagtuon alang sa dinaliang pagpahimutang sa mga biktima sa tukoron nga kabalayan.

Dugang pa niya nga gitun-an karon ang sugyot nga pagpaubos sa proyekto sa Gawad Kalinga housing program nga pagaugmaron diha mismo sa naugdaw nga lugar alang sa permanente ug disenteng pinuy-anan.

Matud pa niya nga ang Gawad Kalinga sa Couple for Christ sa dakbayan unang gipatuman sa barangay Jagobiao diin liboan ka lumolupyo sa maong lugar ang nakapahimulos niini.

Si Jonkie Ouano miingon nga kapin sa 2,000 ka mga kabus nga lumolupyo sa dakbayan ang nakahimulos sa gipasiugdahang housing program sa dakbayan.

Kini gipahimutang sa mga luna nga gipaubos sa Community Mortgage Program nga ang kagamhanan sa dakbayan maoy nagpasiugda niini ang giisip usab nga maoy originator.