Tomas wala mahulga bisan kinsay moatbang, Margot di mokandidato

Giklaro ni Mayor Tomas Osmeña nga wala siya mahadlok ug labaw nang dili mopili og si bisan kinsa nga mamahimong gustong mo-atbang kaniya sa eleksyon karong Mayo.

Mao kiniy reaksiyon ni Osmeña human nilutaw karong bag-o nga giingong gitanyagan ni kanhi Cebu City Sports Commissioner Jonathan Guardo si Lahug barangay captain Mary-ann delos Santos nga maoy molansar atbang kang Osmeña.

Si Guardo nga maoy chairman sa Genuine Opposition dinhi sa dakbayan gikataho nga nitanyag og P5 milyones nga inisyal nga campaign funds ngadto kang delos Santos aron molansar atbang kang Osmeña human niklaro si kanhi mayor Alvin Garcia nga dili na molansar og balik sa umaabot piniliay.

Sa press conference kagahapon ni Osmeña gipadayag niini nga dili siya mopili og bisan kinsay mokontra niya sa umaabot piniliay tungod kay alang niya tipik ug kabahin kini sa demokratikanhong pamaagi dinhi sa nasud.

Giklaro sab sa mayor nga dili tinuod ang taho nga ang iyang asawa nga si Margot maoy iyang palansaron kon walay mobarog nga lig-ong kontra karong umaabot piniliay.

Nunot niini gitin-aw usab ni Osmeña nga dili tinuod ang mga tabitabi nga iyang taktakon sa BOPK sila si konsehal Arsenio Pacaña ug Rodrigo Abellanosa.

Apan giangkon sab niya nga wala pa usab nila hingpit nga makompleto ang line-up pagka konsehal sa South ug North districts.

Gibutyag ni Osmeña nga bugtong sila si konsehal Jocelyn Pesquera, Procopio Fernandez sa south district ug konsehal Gabriel Leyson ang ilisan human mapupos ang ikatulo ug katapusang termino sa taho, si Leyson ang determinado nang molansar pagka mayor didto sa siyudad sa Talisay.

Ang apil sa longlist sa BOPK pagka konsehal sa South District mao si ABC President ug Guadalupe barangay captain Eugenio "Jingjing" Faelnar, Ritche Osmeña, Pahina San Nicolas councilor Ryan Go ug City Hall Human Resource Personnel Atty. Ralph Sevilla.