Codilla pasumetiron og mga dokumento bahin sa mga utang nga krudo

Ang Bureau of Fire Protection - 7 miawhag kang Cebu City Marshall Ismael Codilla nga mosumiter og dokumento aron makagahin og pundo ang buhatan sa BFP ug ibayad sa mga utang niini ngadto sa usa ka gasoline station.

Sa press conference kagahapon si BFP-7 direktor Eleuterio Iturriaga miingon nga ang Cebu City BFP naka utang og dili momenus P433,000 sa usa ka gasoline station sa barangay Basak ning dakbayan sa Sugbu.

Matud pa ni Iturriaga nga gitagaan niya si Codilla og igong oras nga maka-produce og dokumento tungod sa utang niini nga nagsugod niadtong tuig 2005.

Matud pa ni Iturriaga nga uwahi na niya nahibaw-an nga ang gas nga gi-allocate alang sa city fire department gigamit usab sa firetrucks sa siyudad sa Sugbu.

Tungod niini ang BFP mi desisyon nga dili na pahupton si Codilla sa budget sa krudo alang sa firetrucks ug kini mo diretso sa sub station sa siyudad sa Sugbu.

Ang BFP mi-implementar og bag-ong sistema diin adto na mag-agi sa Regional Supply and Control Office kuhaon ang registration slips sa krudo.

Ang pagmando kang Codilla sa pag-liquidate sa mga nagasto niini wala nagpasabot nga gusto niini nga tangtangon kon dili aron masulbad ang problema niini.

Matud pa ni Iturriaga nga wala mohatag og saktong dokumento si Codilla sa dihang nagmiting kini sila sa milabay'ng buwan sa Pebrero, gani mihatag lang kini og demand letter nga gikan sa gasoline station aron bayaran ang maong utang.