BOPK barangay officials taktakon kung dapig ni Atan

Taktakon pagka sakop sa Bando Osmeña Pundok Kauswagan (BOPK) kadtong mga barangay kapitan sa South District nga adto mopaluyo sa kandidatura ni kanhi Cebu City Commissioner Jonathan "Atan" Guardo pagka kongresista atbang ni Kongresista Antonio Cuenco.

Giluwatan kining maong mensahe ni Mayor Tomas Osmeña founder sa BOPK atol sa press conference kagahapon.

Giklaro sa mayor nga kadtong mga barangay kapitan nga dili mosuporta sa kandidatura ni Cuenco gikonsiderar usab nila kining kontra sa partido.

Si Osmeña pormal nga ni-endosar sa kandidatura ni Cuenco pagka kongresista sa South District atol sa General Assembly sa Association of Barangay Council (ABC) niadtong Sabado.

Giangkon ni Osmeña nga makasugat sila og dakong problema ilabina kon modaug si Guardo batok kang Cuenco sa eleksyon karong Mayo tungod kay mao usab unya kini moatbang ni Bise Mayor Michael Rama nga maoy opisyal nga kandidatu sa BOPK pagka mayor sa dakbayan sa 2010 election.

Gikonpirmar usab ni Osmeña ang iyang pagpapili og balik sa ikatulo ug katapusang termino sa eleksyon karong Mayo.

Giluwatan kining maong pahimangno sa mayor ngadto sa mga kapitan nga kaalyado sa partido human kini makadawat og taho nga gipangkamang karon ang mga kapitan ug konsehal sa mga barangay sa South District aron adto mopaluyo kang Guardo.

Pagkakaron bugtong sila sa Pasil barangay captain Romeo Ocarol mao palay pormal nga ni-anunsiyo sa iyang pagsuporta sa kandidatura ni Guardo .